Молитва перед иконой Божией Матери “Августовская”

Тропарь, глас 4

 Днесь притецѐм, вѐрнии, к Царѝце Богома̀тери, осеня̀еми Пречѝстыя Дѐвы о̀бразом, на возду̀се ру̀сским во̀ином явлѐнным, и путь побѐды укза̀вшим с вѐрою к Ней взыва̀вшим: О Пресвята̀я Влады̀чице Богоро̀дице, во̀инство христолюбѝвое укрепѝ, зѐмлю Ру̀сскую и лю̀ди ея̀ заступи, от вѝдимых и невѝдимых враг защитѝ, и спасѝ ду̀ши на̀ша.

Кондак, глас 4:

Днесь, вѐрнии лю̀дие, свѐтло почтѝм Пречѝстыя Богома̀тере пречу̀дное явлѐние, пода̀вшей во̀ином в вѐре правосла̀вной укреплѐние, от смѐрти, ран и вся̀ких лю̀тых свобо̀ждение, и к Тоя честно̀му о̀бразу зову̀ще припадѐм: ра̀дуйся, Богоро̀дице Дѐво Преблагословѐнная, зѐмлю Ру̀сскую от вра̀жескаго обстоя̀ния избавля̀ющая. 

Молитва:

О Пресвята̀я Влады̀чице Богоро̀дице Царѝце Небесѐ и землѝ, страны̀ на̀шея и во̀инства правосла̀внаго всемо̀щная Засту̀пнице! Воспомина̀юще Твоѐ чу̀дное и спасѝтельное, под гра̀дом А̀вгустовом на бра̀ни с герма̀нцы, явлѐние на возду̀се ру̀сским во̀ином, в ско̀рби и тя̀жких обстоя̀ниих пребыва̀вшим, всю зѐмлю Россѝйскую удивѝвшее, благодарѝм Тя Взбра̀нная Воево̀до, о неисчислѝмых Твоѝх чудѐсных засту̀пничествах, дрѐвле и в послѐдняя лѐта отцѐм на̀шим во дни нашѐствий орд иноплемѐнных бы̀вших. Смирѐнно мо̀лим Тя пред пречѝстым о̀бразом Твоѝм: сохранѝ град сей (или: весь сию̀, или: святу̀ю обѝтель сию̀), и предстоя̀щия рабы̀ Твоя̀, и всю зѐмлю Русскую от вра̀жескаго обстоя̀ния, мо̀ра, гла̀да, губѝтельства, тру̀са, пото̀па, огня̀, меча̀, нашѐствия иноплемѐнных и междоусо̀бныя бра̀ни. Спасѝ и сохранѝ, Влады̀чице, под кро̀вом милости Твоея̀ святу̀ю Цѐрковь Правосла̀вную, укрепѝ во̀инство христолюбѝвое, и всем правосла̀вным христиа̀ном явѝ Твоѐ заступлѐние. Низпослѝ свято̀е Твоѐ благословѐние защѝтником Отѐчества на̀шего, всем же с вѐрою и любо̀вию к чу̀дному о̀бразу Твоему̀ припа̀дающим в тру̀дных и опа̀сных обстоя̀ниих обрета̀ющимся, незрѝмую по̀мощь и вразумлѐние с Небесѐ низпослѝ, от искушѐний, собла̀знов и погѝбели спасѝ от всех враг вѝдимых и невѝдимых защити и сохрани. Под покро̀в милосѐрдия Твоего̀ прибега̀ем, Пресвята̀я Дѐво: молѝтв на̀ших не отрѝни во обстоя̀ниих, но от вся̀каго зла и напа̀сти изба̀ви нас, едѝна Чѝстая и Благословѐнная. Амѝнь.

 Молитва, читаемая в Храме Августовской иконы Пресвятой Богородицы (село Бугры, Ленинградская область,Россия)